Uf de Spure vo de Inkas

Letscht Wuche si mir ueber d'Nasca-Linie gfloge, was sehr schoen gsi isch. Zum Glueck hei mir no nuet gaesse gha, de vor luter kreise ueber die Figure isch es ues grad chli schlaecht worde. Vo Nasca si mir mit em Nachtbus nach Cusco. Nach ere 14-stuendige Fahrt si mir am naechschte Morge in Cusco acho u scho grad vore Abschlepperin abgfange worde, si het ues ihres Hostal woeue schmackhaft mache. Nach emne Zytli si mir de i "ihres" Hostal, doch de isch es ersch so richtig los gange. Sie het ues jenschti Toure rund um Cusco vorgsteut, derbi hei mir scho vo Afang a gseit, dass mir kener settige Toure wei mache, sie hets eifach nid woeue ghoere! Nachdaem mir klar u duetlech gseit hei, dass mir huet nuet bueche/choufe, isch sie chli beleidigt abgschwirrt u mir hei aendlech i Rueh choenne zmoergele. Cusco isch es wunderschoens gmuetlechs Stedtli, di ehemaligi Houptstadt vo de Inkas. Einisch meh hei mir ues uf em Maerit mit Nuess, Inca-Schoggi u feine Fruecht ideckt, es geit nuet ueber ne fruesche Papaya- oder Mango-Drink are Fruchtbar uf em Maerit! Ir Umgaebig hets viu Inka-Ruinene. Bim Bsuech vo sore Ruine si mir vomne Typ agsproche worde. Er isch e Indigena, git am Morge Schueuh u am Nami fuehrt er Luet duer d'Ruinene. Da mir d'Ruinene scho gseh hei, isch aer zu ues gsaesse u het chli dervo verzeut. Einisch het er de la duereblicke, dass er e spirituelle Fuehrer sig. Churz druf abe hei mir ues ihre Cocablaetter-Zeremonie befunde. Aer het immer wieder oeppis gmurmlet, blase oder sueschtigi Geschtene gmacht, derbi si mir vou groeicheret worde. Es isch wuerklech sehr speziell gsi, aber o sehr interessant.
Geschter si mir de uf e Machupicchu. Mir hei im Dorf im Tal unde uebernachtet u si am Morge frueh los marschiert. Es isch stockdunku gsi, u mir si froh gsi, dass mir am Nami vorher scho mau dr erscht Teil vom Waeg uskundschaftet hei. Nach ere Haubstund isch es de baerguf gange, mir hei chum die naechschte Tritte gseh, trotz Taschelampe. Zum Glueck, wie mir bim Abstieg gmerkt hei, de so hei mir ke Ahnig gha, wie steil es wuerklech baerguf geit. Ueber 1750 Tritte sis bis zum Igang. Churz vor de saechse si mir de obe acho, es si o no es paar Anderi unterwaegs gsi. Doch churz druf abe isch o scho dr erscht Bus cho u dermit e hufe Touris. Mir hei ues de es schoens Plaetzli fuer e Sunneufgang gsuecht. Dr Blick isch eifach ueberwaeltigend gsi, wie das typische Poschtkartebild. Mir hei ues chum choenne sattgseh. Zum Glueck gits Digitalkameras, de suesch haette mir tusegi vo Foeteli vo daem einte Bild :-).
Itz si mir zruegg in Cusco. Morn goe mir witer i Dschungu vo Peru.

Muchos saludos de Peru, Sonja