Bus-WC u Huehnerkralle

Hallo zaeme

Vor drue Stund si mir vo uesere viertaegige Dschungutour zruegg cho. Es isch eifach dr Hammer gsi, sooooo schoen! Doch zersch no chli oeppis zur Busfahrt hie haere.

Mir si wieder mau chli spaet am Busbahnhof acho. Chum dert, isch e Typ uf ues zue cho (het ues am Vortag dr Schalter vor Busgsellschaft etc. zeigt) u het ues ghetzt gseit, dass mir itz uesi Rucksaeck muesse abgae. Das hei mir gmacht, obschon mir aube gaern gseh, wie uesi Rucksaeck iglade waerde. Nach em obligatorische Gang ufs WC u em Ichouf vo Verpflegig si mir zum Bus gange, vo uesne Rucksaeck ke Spur. Die sige scho uf em Dach vom Bus, het me ues gseit, mir hei aber nuet gseh vor luter Gepaeck. Naer het no oeppis mit em Billet nid gstumme, doch de hei mir aendlech choenne istiege. Es isch wieder mau so ne Bus gsi, wo me sech fasch nuem cha bewege, sobaud dr Vordermaa si Sitz chli abe steut, de isch me iklemmt wie imne Sandwich. Nach ere Stund fahre hets scho dr erscht Haut vore haub Stund gae. Si hei no jenschti Sache ufs Dach glade, u.a. mehreri Chischtene mit Huehner u es Velo. Z'Luschtigschte si aube d'Strasseverchoeifer, entwaeder stuerme sie bimene Haut duere Bus, meischens mehreri, so dass d' Luet wo use wei chum duere choeme oder de stoeh sie unter de Faenschter u strecke ihri Ware entgaege. Da waerde aube Sache zum Fenschter us chouft, so spannend, vo Glace ueber Getrank bis zu WC-Papier, mir hei ues o grad e Sack Popkorn koemerlet. Es isch de scho gli dunku worde, d'Strass isch nid wuerklech guet gsi, no nid fertig, unteeret, dementspraechend het dr Bus nume langsam choenne fahre. Gli einisch isch de dr erscht Gang ufs Bus-WC agstande (ja, es het wieder mau es WC gha im Bus). Es isch e reinischti Kletterpartie gsi, da drue Chind im Gang gschlafe hei. Uf em WC hets natuerlech ke Liecht gha, es het ghudlet wie wiud, me het sech chum choenne haebe. Zmitz ir Nacht hets naebe mir ploetzlech tropfelet, doch bi Sueu isch e haube Bach naeb em Faenschter abe cho. Super, es isch afe 3 oder so gsi u mir hei no Stunde vor us gha. Mittlerwile het sech z'Klima o scho gaenderet gha, isch fuecht u heiss gsi. Am Morge hei mir de aendlech wieder mau Haut gmacht, hei natuerlech z'naechschte WC muesse ufsueche, (das im Bus het nuem so agnaehm usgeh), einisch meh e "Stehschissi", u fuer das zauht me no! Mir si gfahre u gfahre u gfahre, hei ke Ahnig gha, wie lang das es no geit, hei gschwitzt u gschwitzt u gschwitzt. Nach laenge 21 Stund si mir de aendlech acho, es isch grad witer gange mit schwitze. Nach em kuehle Cusco si mir ues di Hitz gar nid gwahnet gsi.

Nach lengerer Suechi hei mir uese Fuehrer fuer i Dschungu gfunde, dr Victor. Er isch ues vomne Kolleg vo Suesu empfohle worde. Wieder einisch hei mir ues chum choenne entscheide, was mir mitnaehme, da mir nume di chline Rucksaeck brucht hei. Zersch sir mir mit emne Boot dr Fluss zduerab gfahre, unterwaegs hets Zmittag gae, Ris u Poulet i nes Blatt vore Bananestude igwicklet, fein. Nach ere Stund si mir de usgstiege u si glofe. Zum Glueck hei mir Gummistiefu uebercho, de dr Waeg isch sehr matschig gsi, si aube bis zu de Wade igsunke im Schlamm. Nach ere witere Stund hei mir e Kanal erreicht u sie i nes Ruederboot umgstiege. Scho denn si mir fasch gfraesse worde vo de Mugge. Gli hei mir de e See erreicht, wunderschoen, umgae vo Palme u Urwald. Mir hei dr See duerquert u naer am Ufer agleit. Chli oberhalb isch uesi Unterkunft fuer die naechschte Taeg gsi. Mir hei bi Iheimische imene Holzhuettli uebernachtet, d'Waend oeppe 2m hoech, gaege obe ofe, es riesigs Dach ueber aues. Es het so richtig gmuefelet, d'Muggenetz hei Loecher gha, dr Typ het no sini Kleider u sini Sache i daem Ruemli ufbewahrt. Er saeuber het unter em Dach sis Bett gha, uf emne paar Holzbraetter. Gaesse hei mir bire andere Familie, 10 Min. entfernt. Es het viu Suppehuehn gae, meh "Gaeder" aus Fleisch, doch isch eigentlech guet gsi, solang es nume ke Suppe mit Huehnerkralle git, hei mir daenkt. Geschter zum Zmittag han ig aber gnau das i mim Teller vorgfunde, e Huehnerkralle! Suesu u i hei ues nume agluegt, haette fasch muesse lut uselache. Sie het de gmeint, ig choenn ja mit uesem Fuehrer tusche. Has de o gmacht, aer hets aber gloub o nid so gaern gha, het aber aus bis uf d'Knoche verzehrt. Ha mir gschwore, dass i mi z'naechschte Mau aus Vegi amaeude!
Die erschte zwe Taeg isch no e Spanierin derbi gsi, het aber usgseh wie e Schwizerin (blond, blaui Auge) u gfoetelet wie e Japanerin! Mir hei durend uf sie muesse warte, doch suesch hei mirs guet gha zaeme. Mir hei mehreri Wanderige duere Urwald gmacht, hei viu Pflanze u Tier gseh. Dr Victor isch super gsi, het geng viu erklaert u interessanti Sache verzeut. Mir hei Affe gseh, jenschti Voegu (Aras leider nume vo witem), Otter, viu Kriechtier, Voguspinnele. Eigentlech haett me im See choenne ga bade, doch nachdaem mir die erschte Ouge vo Aligatore ir Nacht hei gseh luechte u dr Victor Piranhas gfischet het, hei mir ues nueme gwagt. Mir hei ues de mit emne chline Wasserfall begnuegt u ues mit emne Chuebeli duschet. E Viertustund spaeter isch me eh wieder verschwitzt gsi! Die erschti Nacht isch so richtig tropisch gsi, chum zum ushaute, die zwoeiti chli chuehler u ir dritte hei mir trotz Decki so gfrore, dass mir chum hei choenne schlafe. De geschter hets dr ganz Nami graegnet u die beruechtigte "Patagonie"-Winde sie ufcho (die choeme einisch im Jahr fuer nes paar Taeg!). Huet si mir zruegg cho, hei ues u gfroeit uf ne warmi Duschi, isch einisch meh nume chauts Wasser cho im Hotel. Naja, so isch das aebe!

Liebi Gruess, Sonja