Kulinarische Hoeheflug in Peru - Cuy

Vorere Wuche hei mir d'Grenze nach Peru ueberquert. Vorhaer si mir aber no in Copacabana am Titicacasee gsi u hei e Uslufg zure Insle im See gmacht. Mir si ueber d'Insle gwanderet, wunderschoen, links u raechts See, z'Ufer i Sichtwiti u ganz im Hintergrund die schneebedeckte Ande. Es isch immer wieder chli uf und ab gange u mir si beruhigt gsi, dass die drue duetsche rueschtige Raenter hinter ues o hei muesse schnufe (dr See liegt uf 3800m).
Nach emne churze Ufenthaut uf dr peruanische Site vom Titicacasee si mir witer nach Arequipa gfahre, si die letschte Taeg dert gsi. Am erschte Abe si mir mit em Vorsatz furt, aendlech mau Cuy (Meersoeili) z'probiere. Mir si glich nid ganz ueberzuegt gsi, wo mir d'Menucharte mit Biud gseh hei. Bim Bsteue hei mir dr Kellner gfragt, obs es ganzes Tier gaeb oder nume Stueckli. Aer het naer sofort gseit, aes gaeb se o ohni Kopf u i fuef Teili u het derbi chli glachet, het ues am Gring agseh, dass mir vore ganze Sou nid so begeisteret waere. Fritiert hei mir se o no bsteut, dass me weniger gseht. Zum Glueck hets aus Apero e Pisco sour gae, gsponseret vom Restaurant. Dr Ablick vo uesem Aesse, 5 fritierti Teili, dervo 4 mit klar erkennbare Meersoeilibei, isch sehr speziell gsi. Aber nach uesem Drink und vor luter Hunger hei mir gar nid viu ueberleit u hei agfange aesse. Es isch gar nid mau so schlaecht gsi, wuerklech no fein, aber die vile chline Chnoecheli si nid so hitig gsi. Mit dr Zyt hei mir no jenschti Organ entdeckt, hei graetslet, obs d'Niere oder Laebere sig, e richtigi Anatomie-Stund! Vo da a, u wiu mir immer mis Meersoeili us Chinderzyt u Suesu's Gonzales (ihres no laebige Soeili) i Sinn cho si, hets ues afa gruuse. Mir waerde das sicher nid no einisch wiederhole!
Vo Arequipa us hei mir dr Colca-Canyon bsuecht. Am erschte Tag si mir agreist, am Abe i nes Thermalbad, isch nid so schimmlig gsi wie z'erschte Bad es paar Taeg vorhaer. Am naechschte Tag si mir am fuefi uf e Bus u zwe Stund gfahre, bis mir zum Mirador del Condor cho si. Dr Canyon isch dert 1200m toeif, d'Baerge si teils gaeg di 6000m hoech. Zwe Stund hei mir uf d'Condore gwartet, hei scho gmeint, es sig nuet, aber ploetzlech si zwoei so Ungetuem cho z'fluege, immer wieder. Es isch es einmaligs Erlaebnis gsi. Ha gar nid gwuesst, dass mir so Vogu-Fruende si :-). Mir si de witer am Canyon entlang gwanderet, aber immer ir Hoechi obe.
Einisch meh hei mir i dene Taeg gmerkt, dass Peru viu touristischer is aus Bolivie, spaeter am Morge hets bi daem Mirador nume so gwimmlet vo Cars u Touris.

La Paz

Mittlerwile si mir wieder ir Hoehchi, in La Paz uf 3600 - 4000m. Leider hei mir nid uese plant Waeg choenne ga. Mir hei vo Trinidad, im Tiefland, dr Bus nach La Paz woeue naeh, waere oeppe 20h unterwaegs gsi u dr letscht Teil waer di beruehmti gfaehrlechschti Strass vor Waeut gsi. Waege Ueberschwemmige im Tiefland isch aber ke Bus i die Richtig gfahre. Mir haette wieder zruegg uf Santa Cruz muesse u vo dert witers, waere 2 Tag nume im Bus ghocket. So hei mir churzerhand e Flug uf La Paz buechet u si am naechschte Tag gfloge. Mir hei de vo hie us die beruechtigti Strass zduerab woeue. Geschter si mir los, iquetscht wie ire Sardinebuechse, imene Toyotabusli mit 13 anderne Persone. Ersch unterwaegs hei mir gmerkt, dass mir gar nid uf dere Strass fahre, sondern uf ere noeie. Mir hei scho glaese gha, dass sit Jahre e noei Strass im Bou isch, hei aber nid gwuesst, dass die sit 3 Moenet offe isch u di auti vo de Busse nueme befahre wird. Naja, es isch glich e schoeni Fahrt gsi, d'Ussicht eifach ueberwaeltigend, vo 4600 isch es uf 1700m abegange, obe isch es no u chaut gsi u unde tropisch.
Hie in La Paz gfauts ues sehr. D'Lag vor Stadt i daem Talkessel isch sehr beidruckend. Es het u viu verschiedeni Maerite, immer wieder gits oeppis Noeis z'entdecke. I ha gloub no nie so viu Taxis u Mini-Busse gseh wie hie, fasch dr ganz Verkehr besteiht nume us dene zwoei Fahrzueg!

Dschungeltrip

Mir si itz scho fasch e Wuche in Santa Cruz, im tropische Teil vo Bolivie. Dr Schweiss louft nume so! Die letschte 3 Taeg si mir im Dschungel gsi, unterwaegs mit Rucksack u Zelt. E Iheimische u e 13-jaehrige Bueb hei ues gfuehrt. Am erschte Tag hets no graegnet u d'Strass zum Nationalpark isch nid durchgehend befahrbar gsi, aues schlammig. Nach ere Stund hei mir uesi nasse Schueh gaege d'Tevas tuschet, isch eh viu gaebiger gsi um au di Baech z'duerquere. Dr Fluss, wo d'Grenze zum Park isch, het so viu Wasser gha, dass es ues fasch furtgschwemmt het, so stark isch d'Stroemig gsi. Z'Wasser isch ues bis zu de Hueft cho. Mir si bi viune Huettene vo Bure verbi cho, wo am Rand vom Dschungu laebe. Sie wohne i eifache Braetterhuettli mit Palmwedle aus Dach. Das si scho grossi Unterschiede zu de Stedt.
Churz bevor mir uese Platz fuer d'Nacht erreicht hei, isch es de doch no passiert, i bi uf emne Stei usgruetscht u dr Laengi na i Bach gheit. Zum Glueck han ig aues wasserdicht verpackt gha. Mir si beidi Naecht am gliche Ort blibe, amne Bach, wo me guet het choenne bade. Suesu isch no es Missgschick mit ihrem Zehe passiert, het im Wasser amne Stei agschlage u dr Nagu fasch usgrisse. Es het ues beidi gruuset, dae Zehe azluege, i ha de zuendet (mit dr Taschelampe) u Suesu verbunde. Super, zwe Chrankeschwoeschtere im Urwald, wo sech chum z'haeufe wuesse ! :-)
Am naechschte Tag si mir am Bach entlang ufwaerts, bis zumne grosse Wasserfall. Mir hei Affe, vili Voegu u blaui Schmaetterlinge gseh. U d'Gruesch vom Urwald, eifach einmalig. (Vo de vile Spinnele u de giftige Schlange hei mir zum Glueck nuet mituebercho!) Am Abe am Fuuer het ues de uese Fuehrer no vom Park u vom Land verzeut, isch sehr interessant gsi. Dr Bueb het aube viu Froeid dran gha, ues vo "gfaehrleche" Tier z'verzeue, wo ir Nacht wuerde ums Zaeut schliche. Mir hei ues me drum gsorgt, dass mir vo irgend so ere Floeige gstoche waerde u dass de ploetzlech Made u Wuermer unter ueser Huut laebe (hei mir im Reisefuehrer glaese).
Am letschte Taeg si mir de wieder dr glich Waeg zruegg, es isch so heiss gsi wie no nie. Itz si mir ir Stadt u hei eigentlech uesi immer no fuechte u stinkende Chleider woeue bringe zum waesche, goe am Abe mit em Bus witers. Aber da morn Ostere isch, hei d'Waeschereie nume bis am Mittag offe gha, d'Kleider motte itz hie im Internet-Cafe naebe mir vor sech haere. We mer Paech hei, finde mir ersch am Zischtig e Waeschglaegeheit, de i de Hostals cha me o nid immer guet waesche.

I wuensche oeich schoeni Oschtere u gniesset di feine Osterhase!!! Mir hei hie o Ostereier chouft, aber dr Schoggi isch nid so fein.