Zwoei Bleichgsichter ir Wuesti

Hallo zaeme!

Mir si grad vore chline Wuestewanderig zruegg cho, si imene Nationalpark zum Mirador ufekraxlet u das bi bruetender Hitz. Bim Picnic hei ues vier jungi Wuestefuechs umzinglet bzw. umkreist u ues agfuchet. Tollwut-Impfig sei Dank! Nach emne Zytli ischs ne de z'bloed worde u sie si gange, de hei mir aendlech die schoeni Ussicht choenne gniesse. Hie ar Kueste hets u schoeni Straend, riesig eifach, d'Wuesti chunnt bis as Meer. Z'Wasser isch e chli chaut zum bade, aber mir gniesses sehr eifach am Strand z'liege u chli z'suennele. Aesse fasch jede Tag Fisch, da es huefig gar nuet anders git, aber es isch immer so fein, so dass ues das glich isch. Mir si hie imene chline Oertli, Chanaral, u wohne imene chline Hotel mit Sunneterrasse! D'Luet si u naett u fruendlech, nume verstoeh mir se aube nid so guet, da sie so schnaeu rede u d'Aendige verschluecke.
Vo Santiago sie mir witer nach Valparaiso, e Hafestadt am Meer mit viune farbige Hueser u coole aute Lifte. So ne Lift choeit dir oeich wie z'Marzilibaehndli vorsteue, aber kes richtigs Baehndli, sondern Container, chliner oder groesser, gseh u schoen us. Mir sie jenschti Mau ufe u abe tuckerlet. Mir si de witer ar Kueste entlang nordwaerts, stundelang duer Wuesti gfahre, het wahnsinnig schoen ussgseh. Mit de Busse klappt aues tiptop, we mir nid grad bimene Haut ufs WC loufe u gseh, wie uese Bus furt fahrt, mit uesem Gepaeck! Aber er isch nume ga tanke naebedra u mir hei ues schnaeu wieder erhout vom Schock. Einisch hei mir e Bootstour gmacht u hei Pinguine u Seeloeie gseh, es anders Mau si mir e Pisco-Destillerie ga besichtige. Pisco isch e Trubeschnaps, no fein. Mir hei aber nid so viu choenne degustiere wie denn in Tequila z'Mexico.
So, itz goe mir de ga Znacht aesse u es wird sicher wieder einisch Fisch gae!

Liebi Gruess us Chile, Sonja