Unterwaegs in Bolivie

Hola!

Uesi Tour duer d'Ande u e Salar de Uyuni isch super gsi. Ar Grenze zu Bolivie si mir mit uesem Fahrer, emne eutere, durend Cocablaetter-kaetschende, naette, Bolivianer u vier anderne Luet (u.a. zwe Franzose) imne eher betagte Jeep gstartet. Mir si a verschiedefarbige Lagunene verbi cho, wiss, gruen oder rot, huefig mit u viune Flamingos besiedlet. Stundelang si mir ueber holperigi Pistene gfahre u hei eifach zum Faenschter use gluegt u di grandiosi Ussicht (Baerge, Vulkaen, aendlosi Witi) gnosse. Zwoei Mau hei mir unterwaegs uebernachtet u si de am dritte Tag duer e Salar de Uyuni gfahre, e riesigi Salzwuesti bzw. Salzmeer. Me het chum dr Horizont moege gseh, es isch eifach aues wiss gsi. So schoen!!!
Bolivie isch viu farbiger aus dr Norde vo Chile, choei ues chum sattgseh a dere gruene, huegelige Landschaft, de Maerite, wo me aus, sogar WC-Papier, cha choufe u de Indigenas i ihrne traditionelle Kleider. Aber derfuer hets o viu meh bettelndi Luet, v.a. auti u Chind. We si eim so aluege mit ihrem truurige Blick, isch das so richtig haerzzerrissend u maengisch fasch nid zum ushaute. So hei mir heut amne aute haerzige Grossi es Kamillestruessli abchouft.
Nach em Salar si mir is hoechschte Stedtli vor Waeut, chli meh aus 4000m ueber Meer. D'Hoechi hei mir schoen moege gspuere, bir chlinschte Astraengig hei mir wie Dampflokine muesse schnufe. Die letschte paar Taeg si mir in Sucre gsi, e sehr schoeni Stadt mit viune Hueser im Kolonialstil im Zaentrum. Geschter hei mir dr Nachtbus nach Cochabamba gno. Nach oeppe 10 Stund si mir huet morge hie acho, hei besser gschlafe, aus mir daenkt hei. Es isch u aeng u stickig gsi im Bus, gaege Morge hei mir aber de gfrore. Hinter ues het sech e fuefkoepfegi Familie zwe Sitze teilt, zwe Buebe hei naer am Bode im Gang gschlafe. Am zwoei am Morge het ues e Reifepanne e unverhoffti WC-Glaegeheit hinter em naechschte Busch glieferet. D'Fahrt isch wuerklech no agnaehm gsi, mir findes aber schoener, tagsueber z'reise, so dass me oeppis vor Landschaft gseht.

Merci fuer eui Nachrichte us dr Heimat, ha immer Froei oeppis vo euch z'ghoere!
Muchos saludos, Sonja